Yan Bindiga Sun Kashe Mutane 13 A Kauyuka Uku Na Zamfara

Yan bindiga sun kai hare-hare a kauyukan Dandallah, Tudu Gabas, da Unguwar Majidadi, dukkansu na karamar hukumar Dansadau a jihar Zamfara, inda suka kashe akalla mutane 13.

Kafin faruwar hakan, wasu 'yan sa-kai a yankin sun kashe wani sanannen shugaban 'yan bindiga tare da wasu daga cikin mabiyansa. Bisa bayanan da aka samu, 'yan bindigar sun zargi mutanen kauyukan uku da bayar da goyon baya ga 'yan sa-kan, wanda ya sa suka kai wa kauyukan hari na ramuwar gayya.

Sakamakon tsananin fargaba, kashi 80 zuwa 90 cikin 100 na mazauna kauyukan uku sun tsere zuwa garin Dansadau don neman mafaka. An kuma samu wani hari a kauyen Dangurgu da ya tilasta wa mutane barin gidajensu.

Wani mazaunin yankin ya bayyana cewa sojoji na fuskantar kalubale wajen isa wasu sassan da ke fama da matsalar, ko da yake an samu rahoton harin bam ta sama a wasu sassan jihar Zamfara.