Kwamitin Majalisar Dinkin Duniya Ya Zargi Amurka Da Aikata Laifukan Yaki A Iran

Wani kwamitin bincike na Majalisar Dinkin Duniya kan Iran ya bayyana cewa akwai shaidun da suka tabbatar da cewa Amurka ta kai hare-haren sama kan wuraren fararen hula, ciki har da wata makaranta da ke Minab wadda ta yi sanadiyyar mutuwar mutane sama da 150, kusan 120 daga cikinsu dalibai ne.

Masu binciken sun ce wadannan hare-haren sun kai matakin laifukan yaki bisa dokokin kasa da kasa, saboda sojojin Amurka sun san akwai babbar barazana amma duk da haka suka ci gaba da kai harin ba tare da la'akari da illar da za ta iya biyo baya ba. An kuma samu wani hari daban da sojojin Amurka suka kai a wata cibiyar yada labarai da ke Lamerd, wanda ya kashe mutane 22.

A daya bangaren kuma, kwamitin ya zargi hukumomin Iran da take hakkin dan Adam a lokacin murkushe masu zanga-zangar adawa da gwamnati a watan Disamba, ciki har da kisan gilla ba bisa ka'ida ba da azabtarwa. Yayin da gwamnatin Iran ta bayyana cewa mutane 3,038 ne suka mutu sakamakon zanga-zangar, kwamitin ya ce adadin na iya zama mafi girma.

A wani ci gaba daban, Majalisar Dokokin Amurka ta kada kuri'a 220 zuwa 204 domin iyakance ikon Shugaba Trump na yin yaki da Iran ba tare da amincewar majalisa ba.